الاسكندريه مدينه الحب و الحريه و الجمال

انا زي اي واحد اسكندراني كان ليه ذكريات في كل حته في اسكندريه
في القلعه و اسوارها و متحف الاحياء المائيه
وفي المنتزه بجناينها الحلوه وشاطئ فينيسيا
و في ابو قير
و المسرح الروماني
و المتحف اليوناني
و الشواطئ و الشوارع و الزقايق
الشباب الجدعان
و البنات الحلوين
و محلات الاكل بكل انواعه
و النوادي و الجناين
... و القهاوي ... و القهاوي
و غيرها
ياما حبينا فيك و حبناكي يا اسكندريه
يا ارض الاسرار

زمان و انا صغير كان في ورا القلعه غرفه صغيره
يعني هي ما كانتشي غرفه بالمعني الحرفي و لكن كانت عباره عن مبني حوائطه مهدمه و كنا بنطلع علي سلم حجري
و طبعا كان البحر مأثر عليه جدا يعني تأكل و اعشاب و صدف و غيره
و كان علشان توصله لازم تمشي علي النتوء البارز في سور القلعه اللي كان علي طول دوران السور
و كنا دايما نتسابق مين اللي حيطلع فوق الاول
و طبعا كان فيه مواقف طريفه بتحصل و كمان كان فيه ناس بتقع
بس في النهايه كنا كلنا بنروح مبسوطين
و غير كده كان بقي في ذكريات من النوع اللي بالكوا فيه
حقول لكم عليها المره الجايه